काठमाडौं – अमेरिकी अलराउन्डर हरमित सिंहले नेपाल प्रिमियर लिग (एनपिएल) को तेस्रो संस्करण
जनकपुर बोल्ट्सबाट खेल्ने भएका छन्।
जनकपुर बोल्ट्सले शनिबार आफ्नो समाजिक प्लेटफर्मबाट हरमितलाई अनुबन्धन गरेको घोषणा गरेको छ ।
बोल्ट्सले एसोसिएट क्रिकेटका प्रभावशाली खेलाडी हरमितलाई कप्तानीको जिम्मेवारी पनि दिएको छ । देव्रेहाते स्पिन अलराउन्डर हरमितले पहिलो दुई सिजन सुदुरपश्चिम रोयल्सबाट खेलेका थिए।
पहिलो सिजनको च्याम्पियन बोल्ट्सले हरमितलाई भित्राउन पाउँदा निकै उत्साहित रहेको जनाएको छ ।
अनिल साहको कप्तानीमा बोल्ट्सले पहिलो सिजनको उपाधि जितेको थियो । दोस्रो सिजनमा अनिलसँगैं दक्षिण अफ्रिकाका वायन पार्नेल र नामिबियाका जान निकोल लफ्टी इटनले जनकपुरको कप्तानी गरेका थिए ।
हरमितले एनपिएलको पहिलो सिजनमा ८ विकेट लिनुका साथै ५ खेलमा २८ रन बनाएका थिए । दोस्रो सिजनमा उनले १६६ माथिको स्ट्राइक रेटमा ९ खेलमा १ सय ३३ रन बनाएका थिए भने ६.१८ को इकोनोमीमा १२ विकेट लिएका थिए ।
हरमितले अमेरिकाबाट २९ ओडिआईमा ३९ विकेट र २९ टि ट्वान्टी आईमा ३१ विकेट लिएका छन् ।
‘हरेक सफल टोलीको आधार केवल उत्कृष्ट खेलाडीमात्र होइन, सशक्त नेतृत्व पनि हो । नयाँ सिजनसँगैं जनकपुर बोल्ट्सले नयाँ उर्जा, नयाँ सोच र नयाँ संकल्पका साथ अगाडि बढ्ने तयारी गरिरहेको छ । यही यात्राको नेतृत्व गर्ने जिम्मेवारी हामीले हरमित सिंहलाई सुम्पिएका छौं, बोल्ट्सका प्रमुख कार्यकारी अधिकृत (सिइओ) निरोज खतिवडाले भनेका छन् ।
‘हरमितले आफ्नो उत्कृष्ट अलराउन्ड प्रदर्शनसँगैं मैदान भित्र र बाहिर देखाएको अनुशासन, परिपक्वता र टोली प्रतिको प्रतिबद्धताले उनलाई यो भूमिकाका लागि स्वभाविक छनोट बनाएको हो । उनी जनकपुर बोल्ट्सले आत्मसात गरेको संघर्ष, एकता र कहिल्यै हार नमान्ने भावनाको सशक्त प्रतिनिधित्व गर्छन’ बोल्ट्सका सिइओ खतिवडाले भने।
