काठमाडौँ । बङ्गालको खाडीमा विकसित न्यूनचापीय प्रणालीको प्रभावले बुधबार बेलुकीदेखि देशका अधिकांश स्थानमा निरन्तर वर्षा भइरहेको छ। आज पनि देशभर ठूलो पानी पर्ने सम्भावना रहेकाले आवश्यक सतर्कता अपनाउन मौसम पूर्वानुमान महाशाखाले आग्रह गरेको छ।
हाल मध्य र पश्चिम क्षेत्रका धेरै ठाउँमा निरन्तर झरी परिरहेका कारण नदी तथा खोलाहरूमा पानीको बहाव उच्च भएको छ। विशेषगरी संखुवासभाको अरुण, पर्वतको कालीगण्डकी, लमजुङको चेपेखोला र म्याग्दीको मंगलघाट लगायतका नदीहरूमा ठूलो बाढी आएकाले तटीय क्षेत्रका बासिन्दालाई सुरक्षित रहन बाढी पूर्वानुमान महाशाखाले सचेत गराएको छ।
काठमाडौँ उपत्यकासहित पूर्वी नेपालका केही स्थानमा वर्षा केही कम भए पनि बागमती, गण्डकी, लुम्बिनी, कर्णाली र सुदूरपश्चिम प्रदेशमा आज वर्षाको गतिविधि बढी नै रहनेछ। गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा अति भारी वर्षा तथा कोशी र बागमती प्रदेशका एक-दुई स्थानमा भारी वर्षाको सम्भावना रहेको छ। यसका साथै, मधेश प्रदेश लगायत कोशी, बागमती, गण्डकी र लुम्बिनी प्रदेशका तराई भूभागमा हावाहुरी चल्न सक्ने र अन्य स्थानमा मेघगर्जन तथा चट्याङसहित हल्कादेखि मध्यम वर्षा हुने अनुमान गरिएको छ।
आज र भोलि विशेष गरी पश्चिमी क्षेत्रमा वर्षा केन्द्रित रहने र पर्सि सोमबारदेखि मात्रै पानी पर्ने क्रम कम हुँदै जाने महाशाखाले जनाएको छ। निरन्तरको वर्षा र हिमाली क्षेत्रमा भइरहेको लगातारको हिमपातले जनजीवन प्रभावित बनेकाले अत्यावश्यक अवस्थामा बाहेक लामो दूरीको यात्रा नगर्न र सम्भावित विपद्बाट बच्न पूर्वसावधानी अपनाउन मौसमविद्हरूले सबैमा अनुरोध गरेका छन्।
